Jafnréttisstefna og -áætlun (STS-006)

Jafnréttisáætlun Menntaskólans við Sund er mótuð í samræmi við lög um jafna stöðu og jafnan rétt kynjanna nr. 150 frá 2020, lög um bann við uppsögnum vegna fjölskylduábyrgðar starfsmanna nr. 27 frá 2000 og lög um kynrænt sjálfræði nr. 80 frá 2019.

Markmið áætlunarinnar er að gæta þess að nemendum og starfsfólki skólans sé ekki mismunað eftir uppruna, þjóðerni, litarhætti, kynferði, kynhneigð, fötlun, fjárhag, tungu, trúarbrögðum, stjórnmálaskoðunum. Stefna skólans er að vinna að jafnræði og jafnrétti allra minnihlutahópa þannig að þeir hafi sem jöfnust tækifæri. Markmiðið er að stuðla að jafnrétti kynjanna í skólanum, jöfnum tækifærum, áhrifum og virðingu karla, kvenna og fólks með hlutlausa skráningu kyns í þjóðskrá bæði meðal starfsmanna og nemenda skólans. Grunngildi Menntaskólans við Sund eru virðing, jafnrétti, ábyrgð og heiðarleiki. Gildin skulu endurspeglast í öllu starfi skólans og samskiptum manna á milli.

Jafnréttisnefnd og jafnréttisfulltrúi

Jafnréttisfulltrúi MS er ráðinn til eins árs í senn. Jafnréttisfulltrúi vinnur að jafnréttisstefnu og aðgerðaáætlun skólans um jafnréttismál í samvinnu við jafnréttisnefnd og stjórn skólans. Jafnréttisstefnan lýtur bæði að starfsfólki og nemendum. Jafnréttisfulltrúi stuðlar að framkvæmd aðgerðaáætlunar og vinnur sérstaklega með fulltrúum nemenda, femínistafélaginu, ritnefnd og kosningastjóra. Jafnréttisfulltrúi í samstarfi við félagsmálastjóra stuðlar að því að jafnrétti kynjanna sé gætt í félagslífi nemenda.

Rektor skipar í jafnréttisnefnd í samræmi við 28. grein jafnréttislaga. Jafnréttisnefnd skipa jafnréttisfulltrúi, einn fulltrúi stjórnenda, tveir fulltrúar kennara og tveir fulltrúar nemenda. Jafnréttisnefnd og jafnréttisfulltrúi eru sameiginlega ábyrg fyrir eftirfarandi verkefnum:

• Endurskoðun á jafnréttisáætlun skólans.
• Gæta þess að jafnréttisáætlun sé framfylgt.
• Gera aðgerðaáætlun um hvernig rétta skuli hlut kynja þar sem það á við. Fylgjast með framgangi jafnréttisverkefna innan skólans.
• Hafa eftirlit með að jafnréttislögum sé framfylgt.
• Standa að fræðslu um jafnréttismál.
• Fylgja eftir kvörtunum og kærumálum sem varða jafnréttismál skólans og koma þeim í réttan farveg.

Aðgerðaáætlun

Jafnréttisáætlun skólans er liður í því að stuðla á kerfisbundinn hátt að auknu jafnrétti í skólanum. Í aðgerðaáætlun kemur fram til hvaða aðgerða skólinn grípur til þess að uppfylla skyldur skólans sem greint er frá í 6.- 14. grein laga nr. 150/2020 um jafna stöðu og jafnan rétt kvenna og karla. Einnig kemur hér fram til hvaða aðgerða skólinn grípur til að uppfylla lög um bann við uppsögnum vegna fjölskylduábyrgðar starfsmanna nr. 27 frá 2000 og lög um kynrænt sjálfræði nr. 80 frá 2019.

Launajafnrétti (6. gr laga nr. 150/2020)

Starfsfólki, óháð kyni, skal greiða jöfn laun og allir skulu njóta sömu kjara fyrir sömu eða jafnverðmæt störf. Sama gildir um hvers konar frekari þóknun, beina og óbeina, hvort sem hún felur í sér hlunnindagreiðslur eða er greidd með öðrum hætti. Einnig skal allt starfsfólk njóta sömu kjara hvað varðar lífeyris-, orlofs- og veikindarétt og hvers konar önnur starfskjör eða réttindi sem metin verða til fjár. Þau viðmið sem lögð eru til grundvallar launaákvörðun mega ekki fela í sér kynjamismunun.

Laus störf, starfsþjálfun, endurmenntun og símenntun (12. gr laga nr. 150/2020)

Laus störf í Menntaskólanum við Sund eru auglýst opinberlega og skulu standa opin fólki af öllum kynjum. Sértaklega skal tekið fram að jafnréttissjónarmið séu höfð að leiðarljósi við ráðningar. Störf kennslustjóra, námsbrauta- og námskrárstjóra eru auglýst innan skólans og einnig sérverkefni eins og störf fagstjóra og verkefnisstjóra.

Metnaður skal lagður í að hafa sem jafnast kynjahlutfall innan fagdeilda, faglegra stjórnenda og meðal stjórnendateymis. Skulu stjórnendur tryggja að starfsfólk njóti sömu möguleika til endurmenntunar, símenntunar og starfsþjálfunar óháð kyni.

Samræming fjölskyldu- og atvinnulífs (13. gr laga nr. 150/2020, 1. gr. laga nr. 27/2000)

Í skólanum er leitast við að gera starfsmönnum kleift að samræma starfsskyldur sínar og ábyrgð gagnvart fjölskyldu. Skóladagurinn í MS byrjar 8:30 og hafa kennarar töluverðan sveigjanleika í vinnutíma á milli þess sem þeir kenna samkvæmt stundaskrá. Þriggja anna kerfi skólans gefur kost á sveigjanleika um vinnuskil kennara. Þá er stokkatafla skólans þannig útbúin að kennarar hafi sem heildstæðastan vinnudag og að kennsluhlé geti nýst til að sinna erindum fjölskyldunnar. Kennsluskipting sem er gerð fyrir allt skólaárið í einu skapar fyrirsjáanleg vinnuskilyrði. Annað starfsfólk skólans nýtur aukins sveigjanleika í skipulagningu vinnu og vinnutíma í gegnum verkefnið betri vinnutími en með því er bæði tekið tillit til fjölskylduaðstæðna starfsfólk og þarfa skólans. Lögð er áhersla á að allt starfsfólk skólans njóti sveigjanleika hvað varðar leyfi úr vinnu vegna brýnna fjölskylduaðstæðna.

Kynbundið ofbeldi, kynbundin áreitni og kynferðisleg áreitni (14. og 15. gr. laga nr. 150/2020)

Menntaskólinn við Sund hefur sett sér stefnu gegn einelti, kynbundinni áreitni, kynferðislegri áreitni og ofbeldi (STS-012). Þar kemur fram að einelti, kynferðisleg áreitni, kynbundin áreitni, ofbeldi (hér eftir EKKO) og ótilhlýðileg háttsemi í hvaða mynd sem er sé ekki liðið. Leita skuli allra ráða til að fyrirbyggja slíkt og leysa þau mál sem upp koma á sem farsælastan hátt. Í skólanum skuli lögð áhersla á að efla vitund starfsfólks og nemenda um mikilvægi jákvæðra samskipta og gera þau einkennandi í skólasamfélaginu, t.d. með fræðslu um jafnrétti.

Viðbrögð við og meðferð EKKO mála og annarrar ótilhlýðilegrar háttsemi er nánar skilgreint í verklagsreglum:

• VKL-205 Viðbrögð við og meðferð eineltis, kynferðislegrar áreitni, kynbundinnar áreitni, ofbeldis og annarrar ótilhlýðilegrar háttsemi
  • Nemendur
• VKL-206 Meðferð eineltis, kynferðislegrar áreitni, kynbundinnar áreitni, ofbeldis
  • Starfsfólk

Menntun og skólastarf (15. gr laga nr. 150/2020)

Réttur einstaklings til að skilgreina kyn sitt (3. gr. laga nr. 80/2019)

Jafnréttisvísar (tölfræði yfir starfsmenn, nemendur, nefndir og ráð í skólanum)

Unnið skal markvisst að því að jafna fjölda kvenna og karla í nefndum og ráðum á vegum skólans. Þegar óskað er eftir tilnefningu í nefndir og ráð skal farið fram á að tekið sé mið af 28. gr. laga nr. 150/2020 um jafna stöðu og jafnan rétt kvenna og karla sem segir að hlutfall kynjanna skuli vera jafnt og ekki minna en 40% þegar um fleiri en þrjá fulltrúa er að ræða. Þegar tilnefnt er í nefndir, ráð og stjórnir á vegum ríkis og sveitarfélaga skal tilnefna bæði karl og konu. Jafnréttisvísar eru teknir saman eins oft og þurfa þykir til að vinna að þessu markmiði. Skólinn veitir trúnaðarmönnum aðgang að upplýsingum um auglýst störf og ráðningar í samræmi við ákvæði laga.

Jafnréttisáætlun Menntaskólans við Sund skal uppfærð í lok hvers skólaárs.

[1] Aðalmenn skráðir frá hausti 2022 (áður bæði aðalmenn og varamenn)

[2] Aðalmenn skráðir frá hausti 2022

Síðast uppfært: 21.05.2023