JARÐ2AJ05( - Jarðfræði Íslands, grunnáfangi í jarðvísindum

Áfanginn er grunnáfangi í brautarkjarna náttúrufræðibrautar og fjallar um uppruna alheims, uppruna og gerð sólkerfisins, innri gerð jarðar, flekarek, innræn öfl og orsakir eldvirkni á jörðinni og Íslandi, helstu bergtegundir jarðskorpunnar, landmótun útrænna afla, flokkun jarðhitasvæða og orkunýtingu ásamt jarðfræðilegri sérstöðu Íslands. Samtímis því eru nemendur þjálfaðir í þeim vinnubrögðum sem notuð eru við kennslu í þessari grein. Nemendur vinna ýmist sjálfstætt eða saman í hópum þar sem áhersla er lögð á ábyrgð nemandans á eigin námsframvindu.

Þekkingarviðmið
Nemandi skal hafa öðlast þekkingu og skilning á:

• jarðvísindum sem vísindagrein
• uppruna jarðar, sólkerfisins og alheimsins
• innri gerð jarðar og mismunandi gerð jarðskorpufleka og flekamarka
• þeim tegundum flekamarka sem koma fyrir á Íslandi
• hvar helst má vænta eldgosa á Íslandi og almennt á jörðinni
• hvað einkennir eldstöðvakerfi og virkni tengt því
• hvaða kvikugerðir koma upp í eldgosum á jörðinni og Íslandi og hvað stjórnar því
• nokkrum storkubergstegundum, myndun þeirra og storkubergsmyndunum
• hvar helst má vænta jarðskjálfta á Íslandi og almennt á jörðinni
• hvernig jarðvarminn og vatnsaflið er nýtt til orkuöflunar á Íslandi
• landmótun útrænna afla á Íslandi

Leikniviðmið
Nemandi skal hafa öðlast leikni í að:

• greina muninn á helstu fyrirbærum alheims og geta útskýrt þróun alheims frá Miklahvelli
• greina á milli helstu bergtegunda jarðskorpunnar
• greina á milli innrænna og útrænna afla við mótun landsins
• greina milli mismunandi tegunda flekamarka á jörðinni og áhrif þess á eldvirkni
• greina muninn á innri og ytri reikistjörnum sólkerfisins í uppbyggingu sólkerfisins

Hæfniviðmið
Nemandi skal geta hagnýtt þá almennu þekkingu og leikni sem hann hefur aflað sér til að:

• skilja umfjöllun fjölmiðla um atburði sem tengjast jarðfræði og náttúru
• geta lesið í umhverfi sitt og bera virðingu fyrir náttúrunni
• meta mismunandi verðmæti jarðfræðifyrirbæra
• tengja undirstöðuþætti jarðfræðinnar við umhverfi sitt og daglegt líf

Nánari upplýsingar á námskrá.is