HAGF3RM05 - Rekstrarhagfræði og markaðsfræði

Áfanginn er framhaldsáfangi í rekstrarhagfræði þar sem farið er dýpra í kostnaðargreiningu, kostnaðarútreikninga, núllpunktsgreiningu og áætlanagerð. Nemendur kynnast faglegum vinnubrögðum varðandi fjármál, verkefnastjórnun og markaðssetningu með því að vinna raunhæf verkefni. Fjallað er um grunnhugtök og meginviðfangsefni markaðsfræðinnar og áhersla er lögð á að auka skilning nemenda á gildi markaðsstarfs fyrir neytendur, fyrirtæki og samfélagið í heild. Mikil áhersla er lögð á gagnrýna hugsun og sjálfstæð vinnubrögð.

Þekkingarviðmið
Nemandi skal hafa öðlast þekkingu og skilning á:

• kostnaðarhugtökum og kostnaðargreiningu
• mismunandi afstöðu fyrirtækja til markaðarins
• helstu þáttum í ytra umhverfi fyrirtækja
• markhópagreiningu
• hugsunarhætti og aðferðafræði markaðsfræðinnar
• helstu hugtökum og hugmyndum um vöruþróun og líftíma vöru

Leikniviðmið
Nemandi skal hafa öðlast leikni í að:

• reikna hagkvæmasta verð og magn til að fjármagn fyrirtækis nýtist sem best
• reikna og sýna fram á hvernig auka má hagnað fyrirtækis
• beita grunnhugtökum markaðsfræðinnar við verkefnavinnu
• nýta þekkingu sína á hugtökum og kenningum hagfræðinnar við lausnir skapandi verkefna
• tengja þekkingu sína á hugtökum og kenningum hagfræðinnar við umfjöllun um efnahagsmál
• nýta sér upplýsingatækni við öflun upplýsinga og lausn verkefna

Hæfniviðmið
Nemandi skal geta hagnýtt þá almennu þekkingu og leikni sem hann hefur aflað sér til að:

• túlka og greina, á gagnrýninn hátt, niðurstöður rekstrarhagfræðilegra útreikninga
• taka þátt í hópavinnu við úrlausn verkefna á gagnrýninn og jákvæðan hátt
• meta siðfræðileg álitamál er varða markaðssetningu
• nýta hæfni sína til starfa við einföld markaðsmál
• gera markhópagreiningu fyrir einstakar vörur
• stýra verkefnum þar sem tímamörk eru virt
• miðla vitneskju sinni um rekstrarhagfræði og markaðsmál til annarra
• greina á hvaða markaði tiltekið fyrirtæki starfar og geti metið þau markaðsöfl, leikreglur og samkeppni sem skýra verðstefnu og hegðun þess á markaði

Nánari upplýsingar á námskrá.is