EÐLI2AF05 - Aflfræði

Forkröfur: STÆR2HV05

 

Áfanginn fjallar um undirstöðuatriði sígildrar aflfræði og birtingarmyndir þeirra í daglegu lífi. Kennslan grundvallast á samvinnu nemenda við skriflegar úrlausnir dæma og verklegar athuganir. Áhersla er lögð á öflugt námssamfélag og áhugavakningu þátttakenda.

 

Þekkingarviðmið
Nemandi skal hafa öðlast þekkingu og skilning á:

• eðli og hlutverki eðlisfræðinnar sem vísindagreinar
• meðferð tölulegra gagna og framsetningu þeirra
• helstu hugtökum aflfræðinnar og beitingu þeirra við tölulega útreikninga
• hreyfingu eftir beinni línu og muninum á hraða og hröðun
• notkun vigra við lýsingu á hraða og kröftum
• kraftlögmálum Newtons og beitingu þeirra
• þyngdarsviði jarðar og þyngdarhröðun
• varðveislu skriðþunga
• þrýstingi og mismunandi einingum hans
• lögmáli Arkimedesar og uppdrifskrafti
• vinnu ásamt umbreytingu orku milli stöðu- og hreyfiorku

Leikniviðmið
Nemandi skal hafa öðlast leikni í að:

• beita hinum ýmsu hugtökum eðlisfræðinnar við tölulega útreikninga
• framkvæma einfaldar tilraunir og setja niðurstöður fram á skýrsluformi
• beita grunnlögmálum eðlisfræðinnar til að greina náttúruleg fyrirbrigði
• leysa skrifleg dæmi með ítarlegri uppsetningu og útleiðslu með einingum
• nota einfaldan tækjabúnað í tilraunastofu

Hæfniviðmið
Nemandi skal geta hagnýtt þá almennu þekkingu og leikni sem hann hefur aflað sér til að:

• nota tölvur og tölfræðileg forrit til að mæla og reikna þætti í verklegum tilraunum
• skrá athuganir skipulega, túlka niðurstöður og setja fram bæði myndrænt og á vönduðu máli
• útskýra hreyfiaflfræði í daglegu lífi og tilsvarandi áhrifaþætti
• bera kennsl á afleiðingar breytinga aflfræðilegra þátta í einföldum kerfum