Blár dagur - dagur einhverfunnar

Gerist 06.04.2018

Blái dagurinn er liður í hinu árlega vitundar- og styrktarátaki BLÁR APRÍL. Allt styrktarfé sem safnast rennur óskert til málefnisins en í byrjun apríl í ár verður í annað sinn frumsýnt nýtt fræðslumyndband um einhverfu sérstaklega ætlað börnum, en framleiðsla myndbandsins er afrakstur söfnunar síðasta árs. Það er von okkar að fræðsluefnið muni verða sýnt sem víðast í þeim tilgangi að fræða og upplýsa um einhverfu á jákvæðan og uppbyggilegan hátt. Einnig er gaman að segja frá því að félagið hefur að undanförnu og allt síðasta ár staðið fyrir námskeiðum fyrir aðstandendur einhverfra barna, sem er afar vel tekið. Í apríl mun félagið einnig opna vefverslun á heimasíðunni www.blarapril.is og verður þar hægt að versla ýmsan varning og styðja um leið við félagið. Á heimasíðunni er jafnframt að finna myndbandið um Dag sem framleitt var á síðasta ári, ýmsan fróðleik um einhverfu, einfalda flýtihnappa til að styrkja málefnið ásamt nýjustu fréttum úr starfi félagsins.

Hingað til hafa leik- og grunnskólar landsins haldið upp á bláa daginn með miklum glæsibrag og um leið staðið að fræðslu og umræðu um einhverfu innan veggja skólans. Það er einlæg von okkar að svo verði einnig í ár. Margir hafa brugðið á það ráð að setja myndir á instagram og facebook og merkja þær með myllumerkinu #blarapril sem hefur gætt daginn skemmtilegum blæ og hjálpað til við að breiða út þennan jákvæða boðskap.

Við hlökkum til að sjá ykkur sem flest í bláu föstudaginn 6. apríl. Stöndum saman og fögnum fjölbreytileikanum. Því lífið er blátt á mismunandi hátt! #blarapril

Endilega fylgist með á facebook síðu styrktarfélagsins: http://facebook.com/einhverfa