Aðgerðaráætlun í jafnréttismálum

Jafnréttisáætlun skólans er liður í því að stuðla á kerfisbundinn hátt að auknu jafnrétti í
skólanum. Í aðgerðaáætlun kemur fram til hvaða aðgerða skólinn grípur til þess að uppfylla
skyldur skólans sem greint er frá í 19.- 23. grein laga nr. 10/2008 um jafna stöðu og jafnan
rétt kvenna og karla.

Launajafnrétti, 19. gr.
Samkvæmt lögum skulu allir njóta sambærilegra kjara fyrir sömu vinnu eða jafn verðmæt
störf. Skólinn vinnur að því að hljóta formlega jafnlaunavottun í samræmi við ákvæði laga.
Í Menntaskólanum við Sund sér samstarfsnefnd félaga í KÍ og stjórnenda skólans um að
ákvarða launasetningu kennara, aðstoðarstjórnenda, námsráðgjafa, fagstjóra og
verkefnisstjóra. Samstarfsnefnd undirritar stofnanasamning en hlutverk hans er að auka
gagnsæi og efla samstarf starfsmanna og stjórnenda. Í stofnanasamningi kemur fram
skipting í launaflokka og launaþrep eftir menntun og reynslu sem og ákvæði til
starfsþróunar. Samstarfsnefnd fundar með reglulegu millibili og endurnýjar samninginn
eftir þörfum.

 Laus störf, starfsþjálfun, endurmenntun og símenntun, 20. gr.
Laus störf í Menntaskólanum við Sund eru auglýst opinberlega og sértaklega tekið fram
að jafnréttissjónarmið séu höfð að leiðarljósi við ráðningar. Störf kennslustjóra,
námsbrauta- og námskrárstjóra eru auglýst innan skólans og einnig sérverkefni eins og
störf fagstjóra og verkefnisstjóra.

Samstarfsnefnd starfsmanna MS í KÍ og skólans ákveður árlega fjármagn sem skólinn
veitir í þróunarstyrki til félagsmanna í KÍ sem vinna að þróun á skólastarfi í MS óháð kyni.
Fimmtán til tuttugu starfsmenn hafa farið árlega á vegum skólans á námskeið, ráðstefnur
og í starfsspeglun fyrir styrki frá Erasmus+ og er haft að leiðarljósi að gefa öllum
sambærileg tækifæri á að fara í slíkar ferðir að uppfylltum ákveðnum skilyrðum. Önnur
starfsþróun, þróunarverkefni, starfendarannsóknir og námskeið skipulögð af
endurmenntunarstjóra MS standa öllum starfsmönnum jafnt til boða.

Samræming fjölskyldu- og atvinnulífs, 21. gr.
Í skólanum er leitast við að gera starfsmönnum kleift að samræma starfsskyldur sínar og
ábyrgð gagnvart fjölskyldu. Skóladagurinn í MS byrjar 8:30 á morgnana og hafa kennarar
töluverðan sveigjanleika í vinnutíma á milli þess sem þeir kenna samkvæmt stundaskrá.
Með þessum hætti gefst möguleiki á að auka sveigjanleika í skipulagningu á vinnu og
vinnutíma þannig að bæði sé tekið tillit til fjölskylduaðstæðna starfsmanna og þarfa
skólans. Þriggja anna kerfi skólans reynist góður og sveigjanlegur rammi utan um vinnuskil
kennara. Kennarar geta skilað árlegri vinnu sinni með ólíkum hætti á hverri önn og jafnvel
á færri önnum ef óskað er. Þriggja anna kerfið liðkar fyrir kennurum sem fara í fæðingarog
foreldraorlof, bæði þeim sem hefja orlof og þeim sem snúa aftur til starfa að loknu orlofi.
Þá er stokkatafla skólans þannig útbúin að kennarar hafi sem heildstæðastan vinnudag og
að kennsluhlé geti nýst til að sinna erindum fjölskyldunnar. Kennsluskipting sem er gerð
fyrir allt skólaárið í einu skapar fyrirsjáanleg vinnuskilyrði og auðveldar samræmingu
fjölskyldu og atvinnulífs.

Kynbundið ofbeldi, kynferðisleg áreitni, 22. gr.
„Atvinnurekendur og yfirmenn stofnana og félagasamtaka skulu gera sérstakar ráðstafanir til að koma
í veg fyrir að starfsfólk, nemar og skjólstæðingar verði fyrir [kynbundnu ofbeldi, kynbundinni áreitni eða
kynferðislegri áreitni] 1) á vinnustað, stofnun, í félagsstarfi eða skólum.“

Hverskyns kynbundin eða kynferðisleg áreitni er ekki liðin í Menntaskólanum við Sund.
Allir nemendur og starfsmenn eiga rétt á því að komið sé fram við þá af virðingu og að þeir
sæti ekki kynbundnu ofbeldi, kynferðislegri áreitni eða kynbundinni áreitni.

Ef starfsmenn telja sig verða fyrir kynbundnu- eða kynferðislegu ofbeldi eða áreitni skulu
þeir leita til rektors eða trúnaðarmanna og nemendur geta leitað til námsráðgjafa eða
kennslustjóra. Leitað verður sátta ef svo ber undir en málinu komið í lögformlegan farveg
takist það ekki eða grunur leikur á alvarlegu broti. Á öllum stigum skal tryggt að aðilum
máls sé veittur viðeigandi stuðningur.

Menntun og skólastarf, 23. gr
„Kynjasamþættingar skal gætt við alla stefnumótun og áætlanagerð í skóla- og uppeldisstarfi“.

„Á öllum skólastigum skulu nemendur hljóta fræðslu um jafnréttismál þar sem m.a. skal lögð áhersla á
að búa bæði kynin undir jafna þátttöku í samfélaginu, svo sem í fjölskyldu- og atvinnulífi“.

„Kennslu- og námsgögn skulu þannig úr garði gerð að kynjum sé ekki mismunað.“

„Í náms- og starfsfræðslu og við ráðgjöf í skólum skulu piltar og stúlkur óháð kyni hljóta fræðslu og
ráðgjöf í tengslum við sömu störf.“

Jafnréttisvísar (tölfræði yfir starfsmenn, nemendur, nefndir og ráð í skólanum)
Unnið skal markvisst að því að jafna fjölda kvenna og karla í nefndum og ráðum á vegum
skólans. Þegar óskað er eftir tilnefningu í nefndir og ráð skal farið fram á að tekið sé mið
af 15. gr. laga nr. 10/2008 um jafna stöðu og jafnan rétt kvenna og karla sem segir að
hlutfall kynjanna skuli vera jafnt og ekki minna en 40% þegar um fleiri en þrjá fulltrúa er að
ræða. Þegar tilnefnt er í nefndir, ráð og stjórnir á vegum ríkis og sveitarfélaga skal tilnefna
bæði karl og konu. Jafnréttisvísar eru teknir saman eins oft og þurfa þykir til að vinna að
þessu markmiði. Skólinn veitir trúnaðarmönnum aðgang að upplýsingum um auglýst störf
og ráðningar í samræmi við ákvæði laga.

(Síðast uppfært 24. mars 2020)